تانري‌نين آدي‌ايله

عاغيللي قوْجا

ائل ادبياتيندان حيکايه  (علی ایمانی)

بيري وارميش بيري يوخموش. اسکي زامانلاردا بير شاه وارميش. بو شاهين بير وزيري وارميش.

دئيير بير گون شاه داريخير وزيريني چاغيرير دئيير:

«آي وزير من برک داريخيرام بو آروادلاردا مني تنگه گَتيريبلر. گَل بير چؤله باييرا چيخاق.»

وزير: «منيم گؤزوم اوسته شاها همين الآن آتلاري حاضيرلارام.»

شاهدا درباري ليباسلارين اوستوندن معمولي ليباس گئيدي. وزير آتلاري حاضيرلاييب يولا دوشدولر. چوخلو يول گئدندن سونرا بير کندين ياخينليغينا يئتيشديلر. گوردولر کي بير قوجا کيشي اؤکوز ‌ايله جوت سورور يعني يئري کوتان ايله شوخوم وورور آما بير تعجوبلو مسأله‌يه راست گليرلر کي اودا بودور کي بو قوجا کيشي يئري شوخوم وورا وورا بير سئري کردينين اوّلينده بير سئري ده آخرينده اوينايير.

گئتديلر قاباغا.

شاه: «سلام آي قوجا»

قوجا: «سلام عليکم»

وزير: «يورولماياسان آي کيشي!»

قوجا: «ساغ اول قارداش. آللاه سيزي‌ده يورماسين!»

قوجا کيشي‌ده صوبحانه‌سين حاضيرلاميشدي و گؤزله‌ييردي کي اوْجاق اوستونده‌کي چايي قايناسين. تا چاي چؤرگين يئسين .

قوجا: «بويورن قارداش سيزده بير تيکه چؤرک يئيين!»

شاهينان وزير يئرييب قاباغا اوْتورورلار سوفره‌نين باشيندا. چاي چؤرکدن سونرا شاه دئيير: آي قوجا بيز گؤردوک کي سن يئر سورورسن آما بونا تعوجوبلنديک کي سن نئيه زمي‌نين اوّلينده بيرده آخيرينده اوْيناييرسان. آخير بئله گؤرونورکي سن چوْخ شادسان.

قوجا : «قارداشيمين باش ساغ اولسون منيم بو کئفي سازليغيمين بير عيلّتي واردير اودا بودورکي تانري منه بير نجابتلي و سليقه‌لي و خوش اخلاق بير آرواد يئتيريب. اونون ياخشي‌ليغيندان‌دير کي کئفيم بئله کؤکدور.»

شاه : «آي کيشي مگر بو آرواد نئينير کي سنين کئفين بئله سازدير؟»

قوجا: «هئچ زاد! سحر تئزدن دورار سماوري آليشديرار سونرا مني اوْيالدار و منيم چاي چؤرگيمي وئريب سونرا منيم چؤل دستماليمي باغلاييب مني يولا سالار. بو آرودين ادالاريدير کي مني بئله کئفي ساز ائيله‌يير.

شاه قوجا کيشي‌نين بو سؤزلريندن ناراحات اولور چونکي اونون اوچ دنه آروادي واريدي کي اوچون تاپداسايدين بو قوجا کيشي‌نين آروادي‌نين يئرين وئرمزدي. چونکي بيري اويناش‌بازيدي ، داييم درباردا يئييب ايچيب فيکري وزيرلر و درباريلرله اويناشبازليقدايدي. ايکينجي اَلي اَيرييدي يعني اوغرويدو ، داييم دربارين قير _ قيزيلين اوغورلاردي و ساتاردي. اوچونجوسو سؤز بازيدي ، سؤزو بوندان آليب او بيري‌نين قولاغينا يئتيرردي و خالقي سالاردي بير-بيري‌نين جانينا. بودور کي شاه بيردن قوجايا دئدي:

«آي کيشي نئجه‌سن آروادلاريميزي دَييشه‌ک. سن آرواديوي منه وئر من‌ده اوچ آرواديمي وئريم سنه.»

قوجا حيرصلنيب دئدي: «آي گَده! نه دئييرسن مگر من بئغئيرتم کي آرواديمي دَگيشم، بو هانسي دينده دير کي دئيير آروادي دَگيشين؟»

وزير: «آي کيشي هئچ بيليرسن کيمي‌نن دانيشيرسان سن مملکتين شاهي‌نين قاباغيندا دوروبسان.» بو هاندا شاه کوچه پالتارلاريني يئره ساليب درباري ليباسلاري اوزه چيخدي. قوجانين اَل آياغي تيترَتمه‌يه دوشدو و رنگي آتدي.

شاه: «آ کيشي من دئميرم گَل دَييشک. سن بوشا من آليم من بوشويوم سن آل و کمريندن بير کيسه قيزيل پول چيخاديب کيشي‌يه وئردي و آروادلارين بوشاييب او بيريني آلدي. آرادا شاه قوجايا دئدي: «آي قوجا اوّلده سنه دئييم کي بو آروادلارين هره‌سي‌نين بير بؤيوک عئيبي واردير. بيري اوْيناشباز، بيري اوْغرو اوبيري‌ده سؤزبازدي.»

بو ماجرادن آيلار کئچر و بير گون شاه وزيرينه دئيير: «آي وزير گَل صاباح گئدک گؤرک کي بو قوجانين باشينا نه گليب‌دي. ايندي‌يه جن بو نانجيب آروادلار اونو حتماً اؤلدوروبلر.»

گئديللر يئتيشيرلر همانکي يئره آما بو سئري داها تعجوبلَنيرلر. گؤروللرکي قوجا کيشي بير دفعه زمي‌نين اوّلينده بير دفعه اورتاسيندا بيرده آخيرينده اوينايير. بونا گؤره گئديللر قاباغا. قوجا کيشي بونلاري گؤررکن اونلاري قاباقلاييب:

-« سلام شاها ! خوش گلميسيز بويورون اَيله‌شين من ايندي چايي حاضيرلارام»

شاه: «آي کيشي بو گئنه نه اويوندور قاباقجا ايکي دفعه اوينوردون ايندي اوچ دفعه؟ بيز دئديق بو آروادلار سني اؤلدورللر سنين عؤمرووي چورودللر آما ايش ترسه اولوب.»

قوجا بو سؤزلره قولاق آساندان سونرا  دئدي: « شاه سلامت قالسين من بو آروادلاري آلاندان سونرا گؤردوم کي من بو آروادلارينان باجارماياجام اونا گؤره اوتوردوم بورکومو قويدوم قاباغيما بير فيکيرلر ائله‌ديم. چون کي واخت کئچيردي اوچ دنه آرواد چاققال کيمي دوشموشدولر منيم جانيما هره‌سي بير جور شئيطان توخومو کيمي يورد- يووامي تالاييرديلار.

بيري گونده ائوه کيشي گَتيريردي. او بيري ائوين ياغين، دويوسون، بوغداسين ساتيردي او بيرسي‌ده سؤزبازليق ائديب همسايالاري ساليردي بير-بيري‌نين جانينا. اودور کي فيکيرلَشيب تصميمي‌مي توتدوم.

اوّلده اويناشباز آرواديمين فيکرين ائله‌ديم، گتيرديم حَيطه بير دنه ايضافه قاپي قويدوم. اويناشباز آرواديمي چاغيريب دئديم:

«آرواد سن اويناشبازليق ائله‌ييرسن منده بيليرم. ايندي کي سن اؤز ايشينده‌سن و منيم‌ده ايشيم يوخدور من ائوه گلنده باري کيشي دوستلاريني او بيري قاپيدان يولا سال گئتسين تا منيم گؤزوم اولارا ساتاشماسين. اويناشباز آرواديم بو سؤزلرله هوشو باشينا گليب بو ايشلريني ترک ائله‌دي حتي قوللارين چيرمالاييب تازا قاپي‌نين يئرين اؤزو توتدو.

ايکينجي آرواديم کي اَلي اَيريدي و ائوين هر شئيين ساتاردي اونا دا بئله بير فيکر ائله‌ديم. بير گون گئتديم بازارا و بير دنه تارازي آلديم ائوه گليب اوغرو آرواديمي چاغيرديم:

- «آي آرواد»

-«هه آي کيشي نه دئييرسن؟»

قوجا: «گل بورايا سنه بير شئي آلميشام»

آرواديم گلدي منده تارازيني توربادان چيخاردديم قويدوم قاباغينا.

اَلي اَيري آرواد: «بو نه‌دير آي کيشي من بونو نئينيرم نه ايشيمه دَير؟»

قوجا: « آرواد بيليرسن! من بيليرم کي سن ائوين ياغ دويوسون، بوغداسين ساتيرسان اؤزونده بونو ياخشي بيليرسن. آما من دئميرم ساتما. سات آما داش تارازينان سات کي باشيوا بؤرک گئچمه‌سين.» اوغرو آرواديم بو سؤزلري ائشيديب اؤز ايشلريندن پشيمان اولدو و اَلي اََيريليغين داشيني آتدي.»

قوجا کيشي چوبوغون آليشديريب بير ايکي پوک ووراندان سونرا سؤزونه ايدامه وئريدي.

-«عرض ائله‌ييم شاهيما کي من بو سؤزباز آرواديما هر نه قدر دئديم سايمادي و اؤز ايشينه باخدي. بير آز زماندان سونرا کندين جماعاتين سالدي بير-بير‌نين جانينا و من قالديم جماعتين قاخينجي‌نين آلتيندا کي بو نه آرواددير آي کيشي کي سن تاپميسان؟

چوخ فيکيردن سونرا گؤردوم کي بو آروادين نوخوشلوغو دوزلمييه‌جک اودور کي بير فيکر ائله‌ديم. بير گئجه آروادي چاغيريب دئديم: «آي آرواد صاباح سحر تئزدن گئده‌جه‌ييک بير يئره. بونو يالنيز سنه دئييرم او بيرلره دئمه.»

سحر تئزدن سؤزباز آرواديمي مينديرديم آتين يهرينه و يولا دوشدوک. يولدا ها سوروشدو کي آي کيشي هارا گئديريک دئديم دؤز آرواد – دؤز ايندي گؤررسن. او زماندا ياز فصلي ايدي و بيز چؤلده يول گئديرديک. گلديک يئتيشديک آجي چايا. دئديم :«آرواد گَل! بورا دئديگيم يئردير.» آرواد سؤروشدو: «هانکي يئر؟»

دئديم :«گؤرمورسن آجي چايي دئييرم گؤرنه قشنگدير.»

آرواد: «آي کيشي آغلين آزيب مني کنددن بورايا چايي تاماشا ائله‌مگه گتيرميسن؟»

دئديم: «آرواد سن بيلميرسن کي هامي چايي تاماشا ائله‌مگه گليرلر بورايا.» او گون‌ده يازين اوچونجو گونويدي. آتين نوختاسيندان ياپيشيب گتيرديم کؤرپونون اوستونه.

او گون‌ده آجي چاي يامان داشقين و جوشقون گليردي. آز قاليردي کؤرپونو ييخسين. آتي کؤرپونون اوستونه گَتيرندن سونرا دئديم: «گؤرورسن آرواد نه قشنگ منظره‌دي ايندی ايناندين؟»

سؤزباز آرواديم دئدي: «نه بيليم واللاه.» دئديم :«آرواد سن باخ سوداکي باليقلارا گؤر نه قشنگديرلر.»

آرواد کي اَييلدي باليقلارا باخماغا منده بير تَپيک قويدوم اونباسي‌نين اوستوندن کله‌سي اوسته گئتدي چايين ايچينه. نه قدر چيغيردي من فيکير وئرمه‌ديم. اونداکي آجي چاي سؤزباز آرواديمي سورعتي‌نن آپاريردي من چايين ترسينه گئديب سؤزباز آرواديمي آختاريرديم.»

قوجا: «بلي شاها بو اولدي منيم ماجرام. اوندان سونرا کي ائوه قاييتديم خوشبخت ياشاديم. چونکي ايندي ايکي دنه ياخشي آرواديم واريدي. بيري چاييمي اوبيرسي‌ده چؤرگيمي وئريردي. آخشام ائوه گلنده بيري آياقلاريمي يويوب اوبيري‌ده چيگينلريمي اوغور. بو سببلره گؤره‌دير کي ايندي اوچ دفعه زمي بويو اويناييرام»

شاه قوجانين فراستينه ساغ اول دئييب کمرلرينده هر نه قيزيل پول واريدي اونا باغيشلاديلار. سونرا يولا دوشوب گئتديلر ايشلري‌نين دالينجا.

قوجا کيشي يئنه‌ده زمي بويون اوچ دفعه اوينادي چونکي اونون فراستي واريدي.

علي ايماني قراملکي            18/12/85